TARAWA, KIRIBATI | TUNGARU PRESS | October 28, 2026
A tia taan akawa n kunea te tia betinako mai PNG imwiin betinakona inanon 41 te bong inanon marawa. N te rongorongo are kareakea am beba aio ao te tia betinako aei bon Luka Rahan 18 ana ririki n maiu, n kuneaki tii ngaia iaon ana booti imarenan Tarawa ao Maiana irouia taan oki n akawa mai Tarawa.
Te tia betinako aio e beibeti n te raroa ae 2,000 te Kiraomita (KM) man te tabo are moan betinako mai iai, Rahan ea tia ngkai n kawakinaki ao n tararuaaki n te onnaoraki. Kuneakina ea tia n karika te kukurei ao te oki n nano irouia ana utu iaon Papua New Guinea, e ngae n anne ao e kaotia teuaei ba e motirawa ai tarina are raona n betinako teuana te wiiki imwain kuneakina, man tia n karenakoa rabatana i taari ibukin buakakan rabatana.
Te akawa ae riki nakon 41 te bong i marawa.
Rahan ngaia ma ai tarina a mananga man mwengaia i meangin aonon Babua Nukin ae Bougainville ba ana akawa n te namwakaina ae nako ike ea karina naba n uruaki aia intin. E kaotia naba teuaei ba akea naba aia aengkaa are ena kona n totokoa betinakoia n te tai anne.
Kuneakina irouia taan akawa.
E oti n te rongorongo ba e kuneaki Rahan imarenan Tarawa ma Maiana, ngke e kuneaki irouia taan akawa ao e bon nang mamaara ike eaki kona n tei waena mai betinakona n te maan ae riaon nimaua te wiiki inanon marawa. E katikaki ana booti ao n kawaerakeaki iaan te causeway imarenan Betio ao Bairiki, ike a reitaki taan akawa ma te botaki n bureitiman ibukin te makuri n kuakua are ena karaoaki nakoina. E tiku ngkai n kawakinaki ao n kamarurungaki Rahan n te onnaoraki.
E kaota ana boutoka kaain abana i Tarawa.
Jonathan Anthony Kunau, te intinia ae kaain Babua Nukin ae makuri i Tarawa, e ongo te rongorongo ao man tia n kawara Rahan n te onaoraki imwiin kamauana i marawa.
"Kaain abau ao e kakawaki ba nna mena irarikina ao n boutokaia n te tai aei, ao n nooria ba e marurung" e taku teuaei. N reitaki ma ann ao e ibuobuoki naba teuaio ibukin te raitaeka ma taan makuri n kuakua are karaoa te makuri n kuakua nakon Rahan. N ana nonoori Kunau, ao e taku ba ea moanna n reke te marurung irouna.
E mwaneweia naba Kunau ba ea tia n reitaki ma ana utu Rahan iaon Babua Nukin ao n kaotia ba e a tia n kuneaki ao man marurung raoi.
Te kauoua n tai n irekereke ma te betinako irouia kaain PNG
Aio ngkai ai te kauoua n tai n irekereke ma te makuri n kamaiu nakoia kaain PNG. Tabeua te namwakaina n nako ao a kuneaki teniman taan betinako mai PNG irarikin Kiritimati are a tia n kabanea 70 te bong i marawa. Taan betinako aikai a tia n kaokaki nako abaia.
Tungaru Press | Local Voices, Global Stories.
